skip to Main Content

DSC_3973_web1

L’Alchiviu Mario Cervo è la più impultanti cullezioni illu mundu dedicata a la musiga salda. Ill’Alchiviu è custudita palti manna di lu materiali fonograficu stampatu, chi rigualda lu repertoriu tradizionali saldu, registratu tra lu 1922 e lu 1997. Più di 10000 documenti, catalugati e uldinati da lu studiósu di musiga etnica Paolo Angeli e cu lu sustegnu di l’Istitutu Superiori Regionali Etnograficu, cunsentini ogghj di pudé indagà a fundu supr’a la musiga di lu 1900 in Saldigna.

Lu córi di l’alchiviu è la musiga tradizionali: cantu a ghiterra, gara poetica, cantu a tenóri, cantu campidanesu, launeddas, tasgja, canto a cuncoldu, canti e baddhi cu accumpagnamentu di strumenti. Ma v’è locu ancora pa li sóni ch’accumpagnàani li femini laèndi li panni illu riu, pa li tinni impruisati d’una fronda di greddhula usata come ancia, pa li conti ditti ill’anni 30 a li microfoni di Radio Sardegna, pa la trumbitta d’un bandiadóri e pal tutti li sóni e li paràuli ch’hani accumpagnatu, par un seculu, la ‘ita tra campagna, paesi e citài, sighendi lu calendariu di l’attivitài liàti a la tarra. La cilca sempri attenta, ha documentatu puru li pagini d’un’alta musiga, chi ill’anni s’è folclorizzata e italianizzata ancora illi testi.

S’è rializzatu cussì chist’alchiviu com’un corpus unicu supr’a la musiga fatta da li saldi e rifiruta a la tarra nostra ma abbaltu, a lu matessi tempu, a li spirienzi di la musiga moderna, leggera, jazz, rock, folmi solu a l’apparènzia stragni a la storia musigali salda. E, illi produzioni Nuraghe, li dui animi cunvìini. archvio1Appaltenini a lu matessi catalugu la canzoni “Welcome to Costa Smeralda”, chi faci viné a menti lu cumenciu di l’industria turistica gaddhuresa e, a fiancu, li pagghjni più beddhi di lu cantu a ghiterra di lu periodu pói di la gherra, undi cantadóri strauldinari, come Mario Scanu e Cicchèddu Mannoni, esprimini li sintimenti e li ‘alori d’un mundu di pastori e massai ch’arà di scumparì illu ghjru di pochi dicìni d’anni.

Era chista la musiga prifirùta di Mario Cervo. E a chista musiga ha dedicatu li so’ produzioni discografichi. archvio3Grazie a la fólti passioni, mai vinuta mancu illu tempu, ogghj noi pudemu analizzà in modu criticu la storia di la musiga di la tradizioni nostra, e sighì ancora li cambiamenti soziali e culturali chi cu iddha vi so’ stati. Mario Cervo ha lu meritu mannu d’aé datu, in modu attivu e speltu, un contribbutu sustanziali a dissignà, cu li so’ edizioni discografichi, la storia d’una musiga chi tandu era ancora troppu ciòna pa intarissà l’etnomusicologia. È arriàtu cussì a l’anni 90, rigalendici un alchiviu unicu. Insembi a li rari incisioni di lu 1922, agattému centinaia di nastri mai pubblicati, testi di poesia salda moderna di genere rap e, ancora, lu gridu punk noise contr’a una Saldigna militarizzata e cementificata.
Ancora chista è storia. E solu cunniscendi a fundu la realtài soziali di lu tempu nostru e chissa di la cultura salda illu seculu passatu, si póni cumprindì l’
elementi chi facini di la musiga nostra tradizionali, di primm’acchittu ripetitiva e minimale a l’aricchj angeni, una musiga invéci veramenti ricca e unica.

Back To Top