1929
Mario Cervo naschet in Terranoa, primu de chimbe fizos. Sa gioventude la vivet in tempos diffitziles sia pro sos tristos annos de sa gherra, sia pro essere restadu orfanu ancora piseddu. Frequenteit sas iscolas cun profetu fina a sa tertza avviamentu, pensende sempre a ajuare sa famiglia e fatende medas sacrifitzios.
1950
Cumintzat a tribagliare in sa Cumpagnia Portuale de Olbia e inoghe si folmat sa personalidade laica, socialista e antifascista chi mantenet pro tota sa vida. In custu periodu cumintzat a acoglire materiale fonograficu e a chilcare in su logu sas espressiones de sa Sardigna sua. Una chilca chi cumintzeit sighende sa passione sua pro Gavinu De Lunas, ammentu de una piseddidade fata de grammofonos chi sonaianant in sas carreras cun sos piseddos postos addainanti a ‘su magicu istrumentu’ pro iscultare cussu chi Mario Cervo cunsideraiat su re de sos cantadores. In su matessi tempus chilcaiat de recuperare totu su chi eniat pubblicadu in Sardigna, o dae artistas sardos in onzi palte de su mundu, ponzende umpare una regolta unica, inue b’aiat de totu. Musica tradizionale sarda e musica leggera.
1958
Est s’annu chi s’isposat cun Anna Caboni, sa femina chi l’istat acultzu pro tota sa vida.
1962
Naschet sa Nuraghe, prima casa discografica in Sardigna.
1970
Cun ateros fateit naschere sas primas radios liberas a Olbia presentende una trasmissione completamente in limba sarda. S’usu de sa limba logudoresa e gadduresa diventeit unu modu sou in sas faeddadas pubblicas, dimustratzione chi appalteniat a cussu populu chi ancora l’ammentat pro sa sua semplitzidade,sa disponibilidade e sa generosidade.
1980-1997
In sos annos 80 leit parte a sa politiga olbiesa candidendesi in su partidu socialista, ma delusu, sebereit de impignare su tempus in sa passione pro sa cultura sarda. At trasformadu s’amore pro sa terra sua in una chilca de totu su chi li appartenit : discos cassette e nastros musicales,compact disc e puru liberos, giornales e rivistas, ma fina musicas, preghieras, cantos, ballos, boghes e immagines.
Tantos in sos annos ant usadu sa collezione sua, chi restat sa base de medas chilcas a riguardu de sa musica populare sarda a 78 giri, supra su cantu in re e su Rock in Sardigna.
Totu agataiant notiscias, informatziones, discos de registrare o de copiare, dae sos istudiosos a sos semplices appassionados. Sos tantos interesses de Mario Cervo e de s’archiviu sou andant dae sa musica sarda de sos annos 20 a sa musica classica, dae sos Tenores a su Jazz, a sa musica tradizionale, a sa musica leggera de sos annos 60 fina a sos annos nostros.
Est istadu tra sos sotzios fundadores de S’Abboju, associatzione culturale pro dare valore a sa cultura sarda; at leadu parte in modu ativu a tantos abbojos a riguardu de s’Iscottis, chi ballant in totu sa Gaddura. Est istadu membru de sa “consulta” pro dare valore e ispatziu a su dialetu gadduresu.
Mario Cervo, a s’interesse pro sa musica, uniat un’ismisurada passione pro su ciclismu. Est tra sos fundadores de sa Sotziedade Ciclistica Terranova e promoviat medas manifestatziones.
Mannu est s’mpignu dadu a s’isport e a sa zente bisonzosa. S’ammentat sa sua isportividade e su rispetu de sas regulas e de sos aversarios. Sa capatzidade de organizzare est sighida dae medas dirigentes de sas sotziedade isportivas de sa Sardigna intrea. Sa Nuova Sardegna intituleit un’articulu pro Mario Cervo “ MAESTRO DI SPORT E DI VITA”.
Si che andeit in unu manzanu de santugaini de su 1997, ma restat s’ammentu de sos oggettos chi faeddant, de vinile chi cantat, unu veru patrimoniu chi at chelfidu lassare in eredidade a sa ‘idda sua e a sa Sardigna totta.