S’Archiviu Mario Cervo est sa pius importante collezione in su mundu dedicada a sa musica sarda. In s’archiviu est arribada sa mazore palte de su materiale fonograficu istampadu, riferidu a su repertoriu tradizionale sardu, registradu tra su 1922 e su 1997. Pius de 10000 documentos, catalogados e assentados dae s’istudiosu de musica Paolo Angeli e cun su s’ajudu de s’Istitutu Superiore Regionale Etnograficu, permitint oe de istudiare a fundu sa musica de su 1900 in Sardigna.
Sa parte pius importante de s’Archiviu est sa musica tradizionale: cantos a chiterra, garas poeticas, cantos a tenóre, cantos campidanesos, launeddas, tasgja, cantos a cuncordu, cantos e ballos cun acumpanzamentu de istrumentos. Ma b’at locu puru pro sos sónizos chi accumpanzant sas feminas samunende sos pannos in su riu, pro sas sonidas chi nd’essint dae un fotza de candelarzu usada comente ancia, pro sos contos nados in sos annos 30 a sos microfonos de Radio Sardegna, dae sa trumbita de unu bandiadore e pro totus sos sonos e sas paraulas che ant acumpanzadu, pro unu seculu, sa ‘vida tra campagna, iddas e zitàdes, sighende su calendariu de s’atividàde ligàda a sa terra. Sa chilca sempre atenta, at documentatu puru sas paginas de un’atera musica chi in sos annos s’est folclorizada e italianizada, fina in sos iscritos.
S’èst formadu de asie cust’archiviu comente unu corpus unicu supra sa musica fata dae sos sardos e rifirida a sa terra nostra, ma abbertu, a su matessi tempus, a s’isperienscia de sa musica moderna, leggera, jazz, rock, maneras solu a s’apparènscia istranzas a s’istoria musicale sarda. E, in sa produtzione Nuraghe, vivent umpare sas duas animas. Sunt in su matessi catalugu cantones, comente “Welcome to Costa Smeralda”, chi cantant sa naschida de s’industria turistica gadduresa, paris a sas paginas pius bellas de su cantu a chiterra de tempus pustis de sa gherra, cando cantadores istraordinarios, comente Mario Scanu e Cicchèddu Mannoni, deint ‘oghe a sos sentimentos e a sos valores de unu mundu de pastores e de massajos, destinados a morrere in su giru de pagas deghinas de annos.
Custa fit sa musica amada de Mario Cervo. E a custa musica at dedicadu sa sua produzione discografica. Grazie a sa fórte passione manna sua, mai ennida mancu in su tempus, oe podimus analizare in manera critiga s’istoria de sa musica de sa tradizione nostra e sighire ancora sos cambiamentos de sa sotziedade e de sa cultura chi cun issa bi sunt istados. Mario Cervo at su meritu mannu de aere dadu in modu ativu e lucidu, unu contributu fondamentale a faghere, cun sas suas editziones discograficas, s’istoria de una musica chi tando fit ancora naschidolza pro interessare l’etnomusicologia. Est bennidu gasìe a sos annos nostros, regalendenos un’archiviu unicu. Cun sas raras incisiones de su 1922, agatamus chentinajas de nastros mai pubblicados, testos de poesia sarda moderna de su genere rap e puru su gridu punk noise contr’a una Sardigna militarizzada e cimentificada. Custa puru est Istoria. E solu sa connoschentzia a fundu de sa realtàde sotziale de su tempus nostru e cussa de sa cultura salda de su seculu passatu, nos ajuada cumprendere cale sunt sos elementos fundantes, chi faghen sa musica tradizionale parrer de pagu interessu e meda ripetitiva epuru gasi pretziosa et prufunda a s’aboju cun su sentimentu istrantzu.